فیفا ورلڈ کپ: محمد صلاح کے جادو نے مصر کو تاریخی فتح دلا دی

نیوزی لینڈ کے خلاف شاندار کم بیک، مصر نے پہلی بار ورلڈ کپ میں فتح کا مزہ چکھ لیافیفا ورلڈ کپ میں مصر نے یادگار کارکردگی کا مظاہرہ کرتے ہوئے نیوزی لینڈ کو 1-3 سے شکست دے کر تاریخ رقم کر دی۔ محمد صلاح کی قیادت میں مصری ٹیم نے ایک گول کے خسارے سے واپسی کرتے ہوئے ایونٹ میں اپنی پہلی فتح اپنے نام کر لی۔میچ کا آغاز نیوزی لینڈ کے لیے حوصلہ افزا ثابت ہوا، جس نے پہلے ہاف میں منظم کھیل پیش کرتے ہوئے برتری حاصل کر لی۔ فن سرمین نے کارنر کک پر شاندار ہیڈر کے ذریعے گیند جال میں پہنچا کر اپنی ٹیم کو سبقت دلائی، جس کے باعث مصر وقفے تک دباؤ کا شکار رہا۔دوسرے ہاف میں مصری کھلاڑی نئی توانائی کے ساتھ میدان میں اترے اور جارحانہ حکمت عملی اپناتے ہوئے مقابلے کا نقشہ ہی بدل دیا۔ 58ویں منٹ میں مصطفیٰ زیکو نے محمد ہانی کے عمدہ کراس کو ہیڈر کے ذریعے گول میں تبدیل کر کے اسکور برابر کر دیا۔برابری کے گول کے بعد مصر کا اعتماد مزید بڑھ گیا اور محمد صلاح نے اپنی انفرادی مہارت کا مظاہرہ کرتے ہوئے ٹیم کو برتری دلانے والا اہم گول اسکور کیا۔ میچ کے اختتامی لمحات میں بھی صلاح نے فیصلہ کن کردار ادا کیا، ان کی تیار کردہ موو پر محمود تریزیگیہ نے ہیڈر کے ذریعے تیسرا گول کر کے نیوزی لینڈ کی واپسی کی تمام امیدیں ختم کر دیں۔اس کامیابی کے ساتھ مصر نے گروپ جی میں اپنی پوزیشن مضبوط کر لی ہے اور دو میچوں کے بعد چار پوائنٹس کے ساتھ سرفہرست آ گیا ہے، جبکہ نیوزی لینڈ صرف ایک پوائنٹ کے ساتھ جدول کے آخری نمبر پر موجود ہے۔میچ ختم ہوتے ہی اسٹیڈیم مصری شائقین کے نعروں سے گونج اٹھا۔ ہزاروں مداحوں نے تاریخی کامیابی کا بھرپور جشن منایا اور محمد صلاح سمیت پوری ٹیم کو زبردست خراجِ تحسین پیش کیا۔