فیفا ورلڈ کپ 2026: ہالینڈ کا شاندار ڈیبیو ، ناروے کی عراق کے خلاف بڑی فتح

ناروے نے تقریباً 28 سال بعد فیفا ورلڈ کپ میں اپنی واپسی کو یادگار بناتے ہوئے گروپ آئی کے پہلے میچ میں عراق کو 1-4 سے شکست دے دی۔ فتح میں اسٹار اسٹرائیکر ایرلنگ ہالینڈ نے نمایاں کردار ادا کیا اور اپنے ورلڈ کپ ڈیبیو پر دو گول اسکور کیے۔میچ کے آغاز میں عراق نے بھرپور مزاحمت کا مظاہرہ کیا اور ناروے کو کھل کر کھیلنے کے مواقع نہیں دیے۔ تاہم پہلے ہاف میں واٹر بریک کے فوراً بعد ڈیوڈ مولر وولفے کے عمدہ کراس پر ہالینڈ نے گول کر کے ناروے کو برتری دلا دی۔عراق نے 39ویں منٹ میں شاندار ردعمل دیتے ہوئے مقابلہ برابر کر دیا، جب ایمن حسین نے ہیڈر کے ذریعے گیند جال میں پہنچائی۔ لیکن یہ برابری زیادہ دیر برقرار نہ رہ سکی اور چند ہی منٹ بعد عراقی گول کیپر جلال حسن کی غلطی سے فائدہ اٹھاتے ہوئے ہالینڈ نے اپنا دوسرا گول اسکور کر کے ناروے کو دوبارہ برتری دلا دی۔دوسرے ہاف میں ناروے نے کھیل پر مکمل کنٹرول حاصل کر لیا۔ متبادل کھلاڑی لیو اوسٹیگارڈ نے مارٹن اوڈیگارڈ کے کارنر پر شاندار ہیڈر کے ذریعے تیسرا گول کیا، جبکہ میچ کے اختتامی لمحات میں ہالینڈ کی ایک کوشش عراقی کھلاڑی ایمن حسین سے لگ کر اپنے ہی جال میں چلی گئی، جس سے ناروے کی برتری مزید مستحکم ہو گئی۔اس میچ کی ایک تاریخی خاص بات یہ بھی رہی کہ عراقی ٹیم کے متبادل کھلاڑی زیڈان اقبال مردوں کے فیفا ورلڈ کپ میں شرکت کرنے والے پہلے پاکستانی نژاد فٹبالر بن گئے، جو پاکستان اور عراق دونوں کے فٹبال شائقین کے لیے ایک یادگار لمحہ ثابت ہوا۔اس کامیابی کے ساتھ ناروے نے ورلڈ کپ مہم کا پُراعتماد آغاز کر دیا ہے، جبکہ ایرلنگ ہالینڈ نے ثابت کر دیا کہ وہ عالمی سطح پر بھی اپنی غیرمعمولی گول اسکورنگ صلاحیتوں کا سلسلہ برقرار رکھنے کے لیے تیار ہیں۔