فیفا ورلڈ کپ 2026: میسی کی تاریخی ہیٹ ٹرک، دفاعی چیمپئن ارجنٹینا کا فاتحانہ آغاز

دفاعی چیمپئن ارجنٹینا نے فیفا ورلڈ کپ 2026 کے گروپ مرحلے میں شاندار آغاز کرتے ہوئے الجزائر کو شکست دے دی، جبکہ کپتان لیونل میسی نے یادگار ہیٹ ٹرک کے ذریعے فتح میں مرکزی کردار ادا کیا۔کنساس سٹی اسٹیڈیم میں کھیلے گئے میچ میں ارجنٹینا نے ابتدا ہی سے کھیل پر اپنی گرفت مضبوط رکھی۔ میسی نے 17ویں منٹ میں خوبصورت گول اسکور کر کے اپنی ٹیم کو برتری دلائی اور حریف دفاع کو مسلسل دباؤ میں رکھا۔دوسرے ہاف میں الجزائر کے گول کیپر لوکا زیدان کی ایک غلطی کا فائدہ اٹھاتے ہوئے میسی نے اپنا دوسرا گول کیا، جبکہ 76ویں منٹ میں ایک زبردست شاٹ کے ذریعے ہیٹ ٹرک مکمل کر کے شائقین کو مسحور کر دیا۔ یہ میسی کے ورلڈ کپ کیریئر کی پہلی ہیٹ ٹرک بھی ہے۔اس شاندار کارکردگی کے بعد میسی کے ورلڈ کپ گولز کی تعداد 16 ہو گئی، جس کے ساتھ وہ جرمنی کے سابق اسٹرائیکر Miroslav Klose کے ہم پلہ ورلڈ کپ کی تاریخ کے مشترکہ سب سے زیادہ گول کرنے والے کھلاڑی بن گئے ہیں۔میسی نے ایک اور تاریخی سنگ میل بھی عبور کیا اور 38 برس کی عمر میں چھ مختلف ورلڈ کپ ایڈیشنز میں شرکت کرنے والے دنیا کے پہلے فٹبالر کا اعزاز حاصل کر لیا۔ارجنٹینا کی ٹیم اس کامیابی کے بعد گروپ جے میں اپنے اگلے مقابلوں کے لیے پُراعتماد دکھائی دے رہی ہے، جہاں اسے آسٹریا اور اردن کا سامنا کرنا ہوگا۔ دفاعی چیمپئن کی نظریں اب اپنے عالمی اعزاز کے کامیاب دفاع پر مرکوز ہیں۔