فیفا ورلڈ کپ: نیمار افتتاحی میچ سے باہر، اگلے مقابلوں میں شرکت بھی غیر یقینی

برازیل کے اسٹار فٹبالر Neymar انجری کے باعث فیفا ورلڈ کپ میں اپنی ٹیم کا افتتاحی میچ نہیں کھیل سکیں گے، جبکہ آئندہ میچز میں ان کی شرکت بھی مشکوک قرار دی جا رہی ہے۔برازیل کے ہیڈ کوچ Carlo Ancelotti نے تصدیق کی ہے کہ تجربہ کار فارورڈ ہفتے کو مراکش کے خلاف ہونے والے پہلے میچ کے لیے دستیاب نہیں ہوں گے۔ 34 سالہ نیمار گزشتہ کچھ عرصے سے پنڈلی کی انجری کا شکار ہیں اور ابھی تک مکمل ٹریننگ کا آغاز نہیں کر سکے۔اینسیلوٹی کے مطابق نیمار کا بحالی پروگرام (ری ہیب) جاری ہے اور امید ہے کہ وہ آئندہ ہفتے ٹیم کے ساتھ باقاعدہ تربیتی سرگرمیوں میں شامل ہو جائیں گے۔ تاہم ان کی موجودہ فٹنس صورتحال کے باعث 20 جون کو ہیٹی کے خلاف میچ میں شرکت بھی غیر یقینی دکھائی دے رہی ہے۔برازیلی کوچ نے کہا کہ نیمار جلد از جلد مکمل فٹنس حاصل کرنے کے لیے سخت محنت کر رہے ہیں۔ ان کے بقول نیمار نہ صرف اپنی فنی صلاحیتوں بلکہ وسیع تجربے اور نوجوان کھلاڑیوں کے لیے رہنمائی کے باعث بھی ٹیم کے لیے انتہائی اہم ہیں۔واضح رہے کہ نیمار 2023 کے بعد سے برازیل کی قومی ٹیم کے لیے کوئی بین الاقوامی میچ نہیں کھیل سکے، تاہم انہیں ورلڈ کپ اسکواڈ میں شامل کیا گیا ہے۔ برازیل کے تاریخ ساز گول اسکورر 128 بین الاقوامی میچوں میں 79 گول کر چکے ہیں اور یہ ان کے کیریئر کا چوتھا ورلڈ کپ ثابت ہو سکتا ہے۔