فیفا ورلڈ کپ: کینیڈا کی قطر پر 6-0 سے تاریخی فتح، مگر اسٹار مڈفیلڈر کی انجری نے خوشیاں پھیکی کر دیں

وینکوور میں کھیلے گئے فیفا ورلڈ کپ کے ایک یکطرفہ میچ میں کینیڈا نے قطر کو 6-0 کے عبرت ناک اسکور سے شکست دے کر فٹبال تاریخ میں اپنی پہلی یادگار جیت درج کرائی ہے۔ تاہم، اس بڑی کامیابی کے جشن پر اس وقت اداسی چھا گئی جب کینیڈین مڈفیلڈر اسماعیل کونے میچ کے دوران شدید زخمی ہو کر میدان سے باہر چلے گئے۔کینیڈا کی ٹیم نے آغاز سے ہی حریف پر دباؤ بنائے رکھا۔ کھیل کے 16ویں منٹ میں سائل لارن نے پہلا گول کر کے ٹیم کو برتری دلائی، جس کے بعد 29ویں منٹ میں جوناتھن ڈیوڈ نے اسکور 2-0 کر دیا۔ قطر کی مشکلات اس وقت مزید بڑھ گئیں جب 33ویں منٹ میں ان کے کھلاڑی ہومام الامین کو فاؤل کرنے پر ریڈ کارڈ دکھا کر گراؤنڈ سے باہر بھیج دیا گیا۔ پہلے ہاف کے انجری ٹائم میں جوناتھن نے اپنا دوسرا گول داغ کر میچ پر کینیڈا کی گرفت کو پکا کر دیا۔دوسرے ہاف میں قطر کے عاصم عمر مدیبو اور کینیڈا کے اسماعیل کونے کے درمیان گیند چھیننے کی کوشش میں زبردست ٹکراؤ ہوا، جس کے بعد کونے کو اسٹریچر پر گراؤنڈ سے باہر منتقل کرنا پڑا۔ ویڈیو ریویو (VAR) کے بعد ریفری نے مدیبو کو بھی ریڈ کارڈ دکھا دیا، جس کے باعث قطری ٹیم پچ پر صرف 9 کھلاڑیوں تک محدود رہ گئی۔ کھیل کے 63ویں منٹ میں ناتھن سلیبا نے چوتھا گول کر کے اپنی جرسی زخمی ساتھی کونے کے نام کی، جبکہ قطر کے محمد المناعی کی غلطی سے ایک اون گول بھی ہوا اور آخر میں جوناتھن ڈیوڈ نے اپنی شاندار ہیٹ ٹرک مکمل کرتے ہوئے اسکور 6-0 کر دیا۔ اس تاریخی کامیابی کے بعد کینیڈا اپنے گروپ میں پہلی پوزیشن پر آ گیا ہے۔